Þar sem Garðabær stendur nú hefur verið byggð í yfir 1100 ár. Þar hét áður Garðahreppur sem kenndur var við kirkjustaðinn Garða á Álftanesi. Hafnarfjörður tilheyrði honum til ársins 1908. Garðahreppur fékk kaupstaðarréttindi árið 1976 og nefndist þá Garðabær.
Garðabær er sjötta stærsta bæjarfélag landsins en þar búa tæplega 11.000 íbúar. Bærinn vex hratt, þar blómstrar menningar- og íþróttalíf og gróðurfar er afar fjölskrúðugt. Hönnunarsafn Íslands er staðsett í bænum og þar má einnig finna minjagarðinn að Hofstöðum þar sem sjá má merki um næst stærsta landnámsskála sem fundist hefur á Íslandi.
Í Garðabæ og nágrenni eru fjölmörg skemmtileg útivistarsvæði til dæmis meðfram Arnarnes-, Vífilsstaða- og Hraunsholtslæk þar sem finna má samfelld opin svæði frá strönd að svæðum ofan byggðar. Opin svæði eru einnig á milli íbúðahverfa. Þannig tengjast saman stór og smá, náttúruleg eða skipulögð svæði. Austan Elliðavatnsvegar eru Vífilsstaðavatn, Heiðmörk, Búrfell og Búrfellshraun með Búrfellsgjá og Selgjá en inn á þau ná hlutar Bláfjalla- og Reykjanesfólkvanga. Vestan Elliðavatnsvegar eru Urriðavatn og umhverfi þess, Svínahraun, Vetrarmýri og Hnoðraholt og tengja þau byggðina við Heiðmörk.
www.gardabaer.is