Myndarbærinn Hafnarfjörður er í nágrenni Reykjavíkur og skammt frá Keflavíkurflugvelli. Þar er fjölbreytt afþreying og þjónusta í boði fyrir ferðafólk, mikil náttúrufegurð og blómlegt menningar- og íþróttalíf. Þar má einnig rekast á víkinga og huldufólk.
Bærinn dregur nafn sitt af höfninni sem var stærsta verslunarhöfn landsins fram á 16. öld. Á 18. öld var rætt um að gera Hafnarfjörð að höfuðstað Íslands, en slæm samgönguskilyrði, lítil mótekja og undirlendi urðu helstu ástæður þess að Reykjavík varð ofan á í því vali. Hafnarfjörður heyrði undir Álftaneshrepp framan af en eftir skiptingu hans árið 1878 varð bærinn hluti hins nýmyndaða Garðahrepps. Árið 1908 fékk Hafnarfjörður kaupstaðarréttindi og varð sjálfstætt bæjarfélag.
Hafnarfjörður er nú þriðja stærsta sveitarfélag landsins, með rúmlega 26.000 íbúa. Bærinn er þekktur fyrir fjölskrúðugt menningarlíf. Í menningarmiðstöðinni Hafnarborg eru reglulegar listsýningar og á Byggðasafni Hafnarfjarðar er sögunni gerð góð skil. Hróður leikhúss bæjarins hefur borist víða og fornri menningu landnámsmanna og víkinga má kynnast í víkingaveislum Fjörukráarinnar og á víkingahátíðum. Þá er lista- og menningarhátíðin Bjartir dagar haldin ár hvert í júnímánuði og á aðventunni heimsækja margir Jólaþorpið í miðbænum. Ekki má heldur gleyma alþjóðlega höggmyndagarðinum á Víðistaðatúni. Tónlistarlíf er líka með miklum blóma en í Hafnarfirði starfa um 15 kórar fyrir utan skólakóra.
www.hafnarfjordur.is